【原創】神秘情人

上海闲话abc

神秘情人

上海吳語作文，用佛振先生開發個小狼毫吳語輸入法打字，來自版權歸吳越家園wuunion.com所有。
生僻字注音採用拉丁式吳語拼音，上海新派音系，-h表示上去聲。

阿慶是銀行職員，阿嬌是中學老師。兩夫妻有個毛廿歲個囡兒〔neu'ng〕叫阿琳。一家三口太平日腳過得適適意意。

最近幾個號頭，阿慶行爲舉止有個眼勿小個變化。辣屋裡向經常一家頭呆北落厾想心事，越來越少跟娘囡兒兩家頭解山河〔gah-sewu〕。阿嬌也沒多想，定規是工作壓力大伐。

有一日〔gniq〕夜到，阿慶老規矩，吃過仔夜飯一家頭縮進房間睏覺去了。阿嬌夾手跟進了房間，想跟老公發發嗲。阿嬌坐到牀邊抱起老公個頭，擼擼老公個頭髮，問：老公銀行裡近腔把生活〔sanweq〕緊張啊，來親熱親熱可以減減壓。沒想到，阿慶一把推開阿嬌，別過頭懈〔gah〕嗒嗒個回答：儂讓我清淨清淨，我衰瘏〔saduh〕煞了。阿嬌沒想到自家熱面孔貼着老公個冷屁股，阿慶從來沒迪能對待過家主婆。阿嬌難免起了疑心。

連牢仔幾日個觀察，阿嬌越來越心神勿寧。阿嬌跟囡兒講起迪莊事體：阿琳，儂勿覺着儂阿爸最近魂靈頭勿辣嗨。
阿琳也覺着阿爸最近有眼怪，於是搭腔：阿爸會勿會外頭有姘頭了？
阿琳講出了阿嬌心個話。娘囡兒眼睛白擲〔zeq〕。阿琳講：要麼明朝我去跟阿爸個稍看看。

隔日，阿琳轉來告訴姆媽：阿爸吃中飯個辰光，鬼鬼促促個失蹤了。我沒跟牢伊。
橫想豎想，阿嬌決心打電話畀（撥〔peq〕）阿慶個同事阿戇問一聲。阿慶要好朋友交關，阿嬌獨想着阿戇是有道理個。阿戇是個綽號〔tsahroh〕，迪個阿戇是個直肚腸，勿會看山色吹牛山所以畀朋友叫作阿戇。電話裡阿戇個答復完全是阿嬌意料當中個。阿戇有啥講啥：已經兩個號頭了，阿慶勿跟同事一道吃中飯，一家頭迓迓較跑脫了；上班辰光老是神志無主。阿戇疑准足阿慶是有姘頭了。

阿嬌聽仔心火上翻，齊巧迪個辰光阿慶回轉來了。阿嬌沒好氣個一步衝上去：儂隻沒良心個，儂隻覅面孔個。我啥地方對勿起儂了。箇隻狐狸精是啥人？定規是比我年輕漂亮咾。一心一意服侍儂廿多年，到頭來儂嫌鄙我是老菜皮了。

阿慶畀沒頭沒腦一頓臭罵，有眼昏頭昏腦。回頭：儂講啥沒事啊？阿嬌勿依勿繞：儂講，隻狐狸精是啥人？阿慶像煞沒介事個答復：啥地方有臭女人。儂覅瞎想。阿嬌火氣發作過倒平靜下來了，心想還沒捉牢伊個骱〔gah〕，今朝就衹好讓伊裝戇。

第二天中哴，阿嬌迓辣銀行門口等老公出來。阿慶走進了一家咖啡店。阿嬌湊上去一看，沒氣昏過去。要死快哉，辣手個呀，隻男人是屁精！
阿嬌馬上一隻電話打撥囡兒。
阿嬌：儂曉得，娜阿爸結棍個呀。伊軋個是隻男姘頭。
阿琳也畀弄得七葷八素：儂搞錯了伐？
阿嬌咬定仔：我看得親親雙雙，兩家頭手拉手，惡形煞脫了。
阿嬌勿好講啥：男姘頭、女姘頭儕是姘頭，本質一樣個。

阿慶拎隻公文包篤篤定定下班回轉來了。阿嬌跟阿琳已經辣屋裡侯伊攤牌。
阿嬌劈頭蓋腦一頓臭罵：儂隻覅面孔個男人，軋姘頭還軋出花樣經來了。儂是啥辰光變屁精個，還是儂騙了我一輩子。
阿慶畀罵得木知木覺：我哪能是屁精啦，我也從來沒跟別人瞎搞過。
阿嬌越想越齁：儂裝啥野糊蛋。難怪儂對我越來越懈悶〔gahmhen〕。原來是為仔迪隻屁精。我儕看到了。儂中哴向跟隻男人辣咖啡館裡向手擼手、親熱唻。儂拿我臺儕坍光。我前世作孽、眼睛瞎脫嫁畀儂隻屁精。
阿慶迪個辰光恍然大悟，慌忙辯白：儂聽我解釋呀。外加伸出手去拉老婆。
阿嬌正好辣火氣頭哴，身體一扭揮〔hueh〕脫阿慶個手：覅碰我，儂老膩心個。
阿慶衹好立立正，慢慢較講：唉個男人是神父。阿拉是清白個。
阿嬌跟阿琳儕呆脫了。
阿慶繼續〔cihzoq〕講：我一直想跟娜講迪樁事體。應該是三個號頭前頭，我接到了主個招喚〔tzohueuh〕。
阿琳沒好氣個鈍鈍伊阿爸：主打電話畀儂個？
阿慶面色變得邪氣嚴肅：我是頂針個。我是確確實實感受到上帝個招喚。迪種感覺是實實在在個。我就主動跟教會接觸。經神父指點，我可以半路出家當神父，爲神服務、爲信徒們服務。
事體應該是清清爽爽了。阿嬌、阿琳娘囡兒也勿曉得講啥好。
阿嬌呆了半日，定定神問起來：儂是打算出家當神父，格嚜阿拉娘囡兒哪能辦？
阿慶回頭：有啥哪能辦個。阿琳已經長大成人。我伲可以保持友誼。儂也可以另外尋找幸福。
阿嬌、阿琳看阿慶去意已決，即使強留阿慶，阿慶辣屋裡也是魂靈頭勿辣嗨。

幾天後，阿慶辭脫銀行職務，成了一名神職人員。

後記：該文中人名純粹是虛構個。故事情節是根據歐美某地一真實事件改編個。
我吳越地區，當年夏丏〔mih〕尊也拋妻棄子半路出家做了和尚。

［ 本帖最后由 上海闲话abc 于 2013-01-21 01:11:00 编辑 ］

woaijiayw

故事情节是根据欧美某地一真实事件改变

上海闲话abc

woaijiayw 發表於 2013-1-18 13:26
故事情节是根据欧美某地一真实事件改变

谢谢，已经纠正错字。

请大家帮忙看看，还有啥需要修改。

parisiica