【原創】徐娘殺手（上海吳語作文）

上海闲话abc

徐娘殺手
Jignian Saqsoeh

上海吳語作文，用佛振先生開發個小狼毫吳語輸入法打字，來自版權歸吳越家園wuunion.com所有。
生僻字注音採用拉丁式吳語拼音，上海新派音系，-h表示上去聲。

上海黃浦區一高檔公寓裡住辣一對不同尋常個中年夫妻。儀表勿俗〔gnipioh-veqzoq〕個老公——武大郎，是一家跨國公司個老總，常樁出差，尤其是跑香港。貌美如花〔mohmheh-zyhau〕個老婆——潘金蓮，是模特兒〔mudeqel〕出身，現在經營一家模特兒中介公司。

迪日子是禮拜一，武老總照樣拖仔隻行李箱出差香港；潘金蓮出門去經營伊個模特兒中介公司。兩夫妻走下公寓門口吻別。武老總趕飛機，匆匆忙忙先走脫。潘金蓮剛一轉身，撞着公寓門衛兼打掃王婆。王婆是個歡喜夾嘴舌個人。看到潘金蓮就湊上來：武太太儂好呀，娜老公啊是又出差去唻。
潘金蓮隨口敷衍：是個，去香港。
王婆趁機搬是非：香港美女老多哦。
潘金蓮一聽，覺着有眼異樣刮嗒。
王婆勿依勿饒：武老總賣相挺括，又有本事，老討女人歡喜個是伐。
潘金蓮聽到此地心裡向已經是五味瓶〔ngvihbin〕打翻，勿聲勿響跑脫了。

潘金蓮生活從來有規律，每天早浪辣路口轉彎角子哴個咖啡館跟模特兒或者客戶約會談工作。箇日子伊照樣走進迪爿咖啡館。
潘金蓮老規矩坐到靠窗口個位置，翻看報紙等客戶。咖啡店新來服務生西門慶恭恭敬敬個拿咖啡端到潘金蓮臺哴。
潘金蓮眼皮勿擡答了聲：謝謝。
西門慶妗格格個問：迪位小姐阿是做模特兒個？
潘金蓮放下報紙，看看迪個服務生，再發現有新來個服務生，回頭：老早做過模特兒，現在勿做了。
西門慶老奎個回答：一看儂個身材氣質，我就擬准足儂是模特兒了。

潘金蓮聽仔心裡多少是蠻焐心個。儕講女人四十豆腐渣，男人四十一枝花。夫妻兩家頭同樣四十歲出頭，老公一表人才、事業有成，又遠在美女成堆個香港，實在勿敢想下去了；回頭想自家，老早也是千裡挑一個美女，多少男小惠討好。真是多情女人、勿情歲月，慢慢較覺着自家作爲女人存在個意義也沒了。眼面前迪個英俊瀟灑個廿歲橫裡個小夥子，嘴巴又甜，真討人歡喜。

吧檯裡頭，西門慶個舉動畀同事蔡京儕部看到。蔡京是介紹西門慶進店個老同事了，兩家頭一直談得攏。蔡京直來直去個問西門慶：儂隻小鬼頭污搞啥百葉結。
西門慶笑咪咪個回答：我能搞定迪張老菜皮，儂相信伐。
蔡京笑笑：儂覅小看迪張老菜皮。當年也是此地塊出名個美女，多少男人畀伊彈開。伊一徑來阿拉店裡喫咖啡，我從來沒看到伊有外出花。伊雖然現在稍爲上眼年紀，身價勿比從前，我也勿相信儂隻小鬼頭有箇立升。
西門慶賊慝嘻嘻講：阿拉橫東道好伐。
蔡京問：橫眼啥。
西門慶答：要是我能搞定，迪個號頭個店裏收進個小費統統歸我，否則儕部歸儂。
蔡京爽快個答應：一言爲定。
兩個同事伸出右手，心領神會個對拍一記手心。

接下來個幾天，潘金蓮按老習慣去咖啡館。西門慶勿錯過任何時機巴結潘金蓮。潘金蓮儘管心裡也潮翻，但還是毫無理由跨過紅線。西門慶雖然老是熱面孔貼冷屁股，但是還是勿打算打回票。

迪是一個禮拜五，武老總關照老婆週末要去香港出差。潘金蓮萬分勿情願，但是又勿好講啥。

禮拜六早哴，懨氣煞個潘金蓮又趤進了咖啡館。西門慶尋着機會跟潘金蓮搭訕。兩家頭說說笑笑，越坐越近。稀裏糊塗當中兩家頭個肢體距離變成幾乎是零。
潘金蓮突然覺着苗頭勿對，慌慌張張結帳講了聲：覅找了。就衝出咖啡店。
西門慶勿甘心個追出來：潘小姐，儂個打火機。
潘金蓮看到小夥子追出來，心裡向更加是別別跳，昏頭落蹱〔tson〕（或“目充”合體，“亻龐”合體，字庫裏可用個字就祇有“蹱”）個回答：勿是我個，我勿喫香菸個。轉身滑腳溜了。
本生以爲今朝就能贏得一個號頭個小費個西門慶，看到舔鉤個魚今朝又逃脫了有眼喫酸。
吧檯後頭個蔡京對仔西門慶咪咪笑：小鬼頭有苗頭。同事個鼓勵讓西門慶骨頭更加輕了。

但是咖啡館外頭是另外一副景象。勿怕沒好事就怕沒好人。好管閒事個王婆齊巧路過，統統看見。
禮拜天下半天，門衛王婆看見武老總回來，殷勤個湊上去：武先生好呀，儂勿辣嗨個辰光，伊拉趁機了。
武大郎沒聽明白：啥意思？
王婆添油加醋起來：儂老婆跟轉彎角子哴咖啡館裡新來個服務生勾勾搭搭。辣咖啡館裡打情罵俏、勾肩搭背。最後武太太出門，小夥子還跟出來，兩家頭辣馬路哴還拉拉扯扯〔lhalha-tsahtsah〕，纏勿清爽，喫相邪氣難看。
武大郎氣得面色鐵青：覅瞎七搭八。
王婆頓時指天發誓：我親眼看見，騙儂勿是人！
武大郎一記頭變得像隻煨竈貓，悶頭上樓，兩隻腳好像踏辣棉花裡。回到屋裡向，氣頭哴個武大郎看到老婆，白眼一翻，閒話也沒一句，放下包就去休息了。
潘金蓮畀弄得莫名其妙。是迪隻男人辣香港個姘頭逼伊跟我離婚呢；還是香港個姘頭拿伊踢脫，伊拿氣出了我頭哴。乃末潘金蓮喫準武大郎有個香港小三了。潘金蓮越想越殟塞，轉念一想何必想迪牌勿開心事體，夾手想着西門慶，潘經理心裡一時適意交關。
一夜無事，第二日一早，兩夫妻照樣出門上班去。潘金蓮也沒忒注意武大郎，轉身走近路口咖啡店。武大郎殺個回馬槍，經王婆指點跟蹤到路口咖啡店。
咖啡店裡向，因爲老公個冷落，潘金蓮已經徹底放棄對西門慶個防線。西門慶也看出山色，是收官個辰光了，大明大方個喫潘金蓮個豆腐。
武大郎看得火冒三丈，推開咖啡館門一步衝上去揪牢西門慶個頭髮，拿西門慶個頭撳辣吧臺哴。教訓起來：小赤佬，熱儂個大頭昏，敢動我老婆。嚇脫儂個狗眼，也勿看看我是啥戶頭。看我勿擺平儂。
西門慶正春風得意，沒防備畀人家着〔zaq〕末生頭撳牢頭動也孬〔voh〕動了，慌忙回答：儂誤會了，阿拉是白相相個。
武大郎聽仔更加齁：我老婆畀儂隨便白相相啊，儂白相過過幾埭！
畀撳牢頭個西門慶迪記真個發急了：勿是個，我跟同事橫東道。要是我有本事叉牢迪張老菜皮，迪個號頭個小費儕部歸我。勿是真要叉儂個老婆。
武大郎聽到此地氣消脫一半，就放西門慶一記軟檔，掉頭怒氣衝衝個彈了老婆一眼，隨後揚長而去。

潘金蓮箇記洋相出大了。外出花畀老公捉牢，尤其小白臉西門慶是存心白相相伊個。面孔紅到耳朵根，恨勿得有隻地洞鑽下去。也勿曉得自家是哪能回轉去個。

經過幾個禮拜個努力，潘金蓮終於重新贏得武大郎個信任，兩夫妻重歸於好。但是潘金蓮總有眼咽勿下迪口氣，決心收作收作王婆跟西門慶。

迪日一早，潘金蓮出門手裏向捧仔一堆信件，公寓門口王婆已經又湊了上來。潘金蓮裝模作樣接隻電話，摸手機個辰光，潘金蓮順手拿手浪向一堆文件朝王婆手哴一放：請儂幫我拿一拿，謝謝。王婆是個歡喜管閒事個人，趁潘金蓮轉身就看起文件來了。勿看勿曉得，一看嚇一跳。驚叫起來：武太太，儂想拿我飯碗敲脫。我啥地方穿得邋里邋遢〔laqlihlaqthaq〕，啥地方做事體木手木腳。潘金蓮陰勢勢回答：啥物事啊！儂還偷看我個信件，正好加一條。王婆喫癟。

校〔koh〕好王婆個路子，潘金蓮走進咖啡館。出事體後也是頭一趟。
西門慶有眼尷尬：我還沒想是迪能結束個。實在對勿起了。
潘金蓮輕描淡寫個回答一句：無所謂個。唉，儂個廣告倒是做得老讚個。
西門慶聽弗懂了：啥意思。
潘金蓮平靜個回答：喏，馬路哴儕是儂個廣告。

西門慶馬上放下手哴生活〔sanweq〕跑出去。原來迪條路浪向貼滿帶伊照片個廣告，上頭寫：迪個男人專門叉女人白相，跟人家橫東道。

後記：該文中人名純粹是虛構個。故事情節是根據歐美某地一真實事件改編。

［ 本帖最后由 上海闲话abc 于 2013-03-21 06:25:00 编辑 ］

神死恸瞑

现代故事套用古代名著人物角色名以及人物关系，迭能个创意值得鼓励！

guest

好弗容易看脫哉。頂記！