【转帖】吴琦幸：提倡讲上海闲话是有文化个表现

Terrist

吴琦幸:提倡讲上海闲话是有文化个表现

新民网评2月4日个《新民晚报(社区版)》刊登仔一篇题为《新英雄闯荡上海滩，不限户籍个个精英》个杂文，作者来勒文中称：“新上海人，浦东密集度顶高，办公大楼里顶多。搭浦东，尤其是陆家嘴，侪讲普通闲话，话上海闲话是呒没文化个表现，有眼像美国土著红种人。 ”

     我个观点刚好相反，我认为讲上海闲话是有文化个表现。

　　上海从一百多年前头开埠以来，就是一个五方杂处、百川归海个一个开放性城市。上海话个形成就是一种开放个过程。顶早个上海闲话应该就是上海本地人话个本地闲话。伊拉大致浪顿勒上海老城厢一带，差勿多就是今朝个老城隍庙搭仔边浪向个环城公路。迭辰光上海就是一座移民城市，接纳仔来自苏州、宁波、绍兴、苏北、山东咾唦个人，伊拉带来仔各地个方言，乃么上海闲话就勒接受搿眼方言个过程中逐渐丰富起来。

　　我来勒洛杉矶碰着个上海人，勿单单有从中国大陆搭美国来个，还有交关是从台湾或者香港来个，其中就有美国顶大个上海同乡会组织“上海人联谊会”创会会长刘冰。伊来自台湾，是全美顶大个中文图书连锁店长青书店个老板，1949年从上海跟仔父亲搭台湾。伊以前个屋里就来勒老城厢个三牌楼里向。伊老是讲，今朝个上海闲话已经味道变脱嘞。伊讲个是一口地道个上海闲话，例如，伊从来勿讲“阿拉”，一直讲“伲”；伊也从来勿讲“嗲”或者“老好”，一直讲“交关好，邪气好”等等。搿也是上海闲话接受外来语言个一个例子。宋美龄前几年来纽约逝世后，此间电台播放仔几段伊生前勒洛杉矶个讲话，一口上海闲话。

　　由于上海闲话揉进仔苏州闲话、宁波闲话、绍兴闲话，形成仔独特个上海闲话，但是仍属于吴语区，保存仔相当丰富个吴音、吴语，表现力邪气丰富。我曾经来美国采访过老多著名个科学家、教育家、企业家，例如田长霖、朱裕民、王安、黄陈月如等人，侪是一口上海闲话，搿眼精英人物以讲上海闲话为荣，因为伊拉个经历说明仔，上海勿是一个城市，而是一个形象，是一个包容万物百川个开放形象。伊拉来海外讲上海闲话，也将上海个开放同大气传勒全世界。

　　但是勿晓得啥辰光开始，反而本土个上海下一代开始勿讲上海话嘞，全部侪来学校里讲所谓个南方普通话，听上去普通闲话有眼夹生，上海闲话就更加勿来事嘞。每趟我回到上海，听搿些小囡讲普通闲话就有眼奇怪。有个小人讲个上海话味道也开始变脱则，变成仔用北方闲话个一眼词夹进上海闲话个发音。实际浪，一种方言往往就是一种文化。上海个传统文化，其开放个精神就来上海闲话中体现出来，而上海个地方戏曲、地方艺术也是以独特个上海方言为依托，才绽放出绚丽个花朵。沪剧、独脚戏、滑稽戏以及用上海人喜闻乐见个绍兴闲话唱个越剧，侪是上海地方个奇葩，勿会上海闲话，就丧失仔一种勿可多得个艺术享受。

　　我看到下一代勿会讲、听上海闲话，心里向觉着交关遗憾。上海闲话当中个独特幽默、噱头、高雅，伊拉侪呒法触摸搭领会哉。多年之前，滑稽大师姚慕双、周柏春勒美国“上海人联谊会”个邀请之下搭洛杉矶来演出，阿拉为伊拉举办仔一场姚周艺术讨论会，会浪向就有人提出仔上海话式微个问题。姚慕双讲，上海闲话阿拉自家勿重视，但是海外个人交关重视，日本有个研究上海闲话个学者，特意拿仔录音机跟我听上海闲话，录上海闲话。

　　邪气多台湾人为仔搭上海做生意、买房子、生活、上学，侪来勒学习上海闲话，台湾个上海闲话教材也曾经一度成为畅销书。美国个上海人联谊会有鉴于此，特意勒电台开播上海闲话节目，受到听众个热烈欢迎。

　　回顾一记，美国是一个移民国家，顶早是英格兰清教徒搭美洲大陆来，此后世界各国人士移民勒美国。今朝个美国英语以伦敦英语作为基本发音，搿首揉进仔各国个发音搭词汇，包括仔法语、西班牙语、德语、甚至于汉语，不过讲英语个欧美人士从来呒没认为，讲美国英语就是有文化个表现，相反，伊拉认为美国个历史较短，讲美国英语并呒没啥文化，讲伦敦英语才是有文化个表现，才是真个绅士。

　　持“讲上海闲话是呒没文化”观点个人，伊拉呒没深刻理解上海迭座城市个开放搭仔海纳百川个巨大包容力。我呼吁，上海不仅现在要重视上海闲话个保留，而且要让下一代人讲上海闲话。另外，各地方言侪应该继续保留。

　　我勒美国交关年数，屋里侪是讲上海闲话，小人虽然生勒美国，却可以讲得一口流利个上海闲话。有一个秘密可以透露记，上海闲话里向保存仔古汉语当中个尖团音、入声搭清浊音，是学习英语个顶好基础语音噢。不信，你可以仔细

比较不同地方个人说英语就可以知道了。(吴琦幸) (来源：新民网)

［ 本帖最后由 Terrist 于 2009-04-27 11:16:00 编辑 ］

上海闲话abc

上海话写了没啥错别字，牢难得个。

上趟去巴黎，看到一对中国人夫妇对仔小囡讲上海闲话。小囡明显是法国长大个。一口标准上海闲话。问题，上海同龄个小囡侪是普通话，真是讲勿出，话勿出个刮三。

碧云涛

辣辣外國就可以保留母語，啥道理，弗用我來解釋伐，大家儕曉得個

湖州闲话

看到“幸”字，颚化的应该读in，那“幸运”怎么读？in in？台州话没颚化读着就顺耳得多

Terrist

上海话写了没啥错别字，牢难得个。

上趟去巴黎，看到一对中国人夫妇对仔小囡讲上海闲话。小囡明显是法国长大个。一口标准上海闲话。问题，上海同龄个小囡侪是普通话，真是讲勿出，话勿出个刮三。 ...
上海闲话abc 发表于 2009-4-26 22:49 ↩️

我靠，迭篇文章是我翻译个……本来伊写个是普通闲话版本个。

Terrist

辣辣外國就可以保留母語，啥道理，弗用我來解釋伐，大家儕曉得個
碧云涛 发表于 2009-4-26 23:14 ↩️

晓得个，不过讲出来当心吃生活哟……呵呵

碧云涛

大家心裏有數就好

jcfy

得